有「波霸」封號的葉子楣（Amy），為愛郎退出娛樂圈，神隱30年；不過，她的脊骨神經科醫生男友呂錫照，於2018年因心臟病不幸離世，令她傷心欲絕。然而，經過5年的療傷後，她已走出陰霾。近年，她與娛樂圈中人重新connect，並且頻頻參加「老闆級的飯局」，還放風表示隨時可以復出，難免令人聯想她的經濟出現問題。
日前，Amy接受本刊獨家專訪，除了披露這些年的私秘生活之外，還透露曾被懷疑患上抑鬱症，以及去年斥資近4,000萬元，購入何文田一個豪宅單位及車位。原來，多年來投資有道，兼愛錫家人的她，不單止購「磚頭」贈父母，更斥資買樓送兄姊。復出只因為戲癮，她直言：「遇到好嘅劇本，我都唔介意復出，不過我真係唔想再性感！」一眾「波粉」應該很失望！
現年57歲的葉子楣（Amy），年幼時隨父母由內地來港。1985年，她完成第三期亞視訓練班，便開始演藝之旅，其後她獲嘉禾電影公司力邀加盟旗下，並參演《聊齋艷譚》嶄露頭角，再憑《玉蒲團之偷情寶鑑》紅遍東南亞。1991年，她在《夜生活女王霞姐傅奇》中，「升呢」擔當「女一」，走到演藝生涯的高峰。從演而來，Amy的「巨咪」總是不少人茶餘飯後的話題，更因此得到「波霸」的封號，她笑說：「開頭都覺得幾難聽㗎，到𠵱家就覺得好好笑囉，台灣都有波霸奶茶啦，覺得波霸兩個字都幾得意，仲有朋友問我，點解唔將呢兩個字註冊？所以有人用波霸來稱呼我，我都冇乜所謂，聽聽吓已經習慣咗。」
雖然Amy所拍的電影皆香艷無比，但她多年來都堅持原則，就是三點不露。有傳，當年有片商開出天價800萬元要求她放下原則，但她都不為所動，並坦言要將最私秘的留給另一半，成為當年熱話。此外，為保護Amy的「巨咪」，當時的電影公司就為她買下高達200萬元的保險費，創下香港首宗「人體保險」。當年，毛舜筠（Mo姐）與Amy合作電影《情聖》，兩女收工後，一起進入更衣室；接着，Mo姐迅即被記者追訪是否看過Amy的身材？她就巧妙地說：「感謝導演請我參演電影，令我看到珍貴的『800萬』。」
90年代中期，正值Amy的事業巔峰之際，她邂逅脊骨神經科醫生呂錫照，兩人火速熱戀；跟着，她便開始大幅度減產。因為男方曾經歷婚姻失敗，且育有一子，所以兩人沒有結婚的打算。可惜2018年，呂醫生飛往日本開會途中，突發性心臟病離世。兩人相戀26年， Amy當然大受打擊，她憶說：「當然有唔開心啦！但係其實佢好細個就知自己坐飛機好容易有事，因為佢有機會心瓣識開唔識閂，但佢唔肯去做手術。因為會冇咗條肋骨，咁多年來佢都有食藥，所以我都有心理準備。」
縱然兩人未有結婚，然而有指呂錫照名下市值2,000多萬元的診所單位、旗下名車全數留給Amy與前妻所生、同樣是脊醫的兒子。對於名份與遺產，Amy表示早已看透，毫不執着：「佢同個仔感情好好，我同佢剛發展嘅時候，佢成日呃我返公司做嘢，其實係偷偷去見個仔。到後期即係佢死之前，佢兩個已經一齊主理間診所，所以啲嘢俾佢個仔都係正常。結婚方面，我冇諗過生小朋友，兩個人一齊相處，開心就得啦，結婚同唔結婚都係一樣。」
她續說：「至於錢方面，我從來唔靠男人，自己都搵到，一直有做投資，例如：買債券、股票、做定期等。至於買樓，一、兩層就夠，我冇兒冇女，留俾邊個？我一早就已經買樓俾咗父母，就連我兩個阿哥同家姐，我都有買樓嚟送俾佢哋，等佢哋有個安樂窩。」去年，Amy以3,600萬元，購入何文田瀚名高層一個3房單位自住，屋內面積約1,132呎，呎價約32,000元。這個單位不僅可飽覽開揚的九龍塘市景，更能眺望獅子山景，置身其中，令人心曠神怡！
過去30年深居簡出，曾被發現素顏購物的Amy，謝絕應酬，圈中的飯敘聯誼，也甚少見到她的芳蹤，每天只是做運動、玩煮飯仔及帶愛犬去沙灘閒逛等，令她身邊的親朋戚友，甚至連家姐都懷疑她患上抑鬱症，她直說：「我都有諗過自己究竟有冇抑鬱症呢？但其實我真係冇，我個人好樂觀，諗嘢好正面，好似𠵱家出返嚟同朋友食吓飯，打扮吓、化吓妝，我又覺得幾好喎，習慣咗又冇乜嘢，我以後都會多啲出嚟！」對於復出一事，她就直言：「遇到好嘅劇本，我都唔介意復出，不過我真係唔想再性感！」
儘管Amy口口聲聲表示享受單身，但實情她依然有一個「戀愛腦」，她語氣嬌媚地說：「個個女人都想有個男人錫自己㗎啦！我都唔例外，有個伴錫吓你、𠱁吓你，都幾好㗎，不過我又唔急嘅，因為要搵到一個我自己鍾意，又要夾到嘅。」由於Amy是非吸煙人士，所以她亦希望另一半不吸煙，還有最重要的條件：「我最憎男人打女人，呢個一定唔得囉！其實講到尾，都係要自己鍾意。」閒時喜歡煮番幾味的Amy，最叻煲湯養生，入得廚房、出得廳堂，要找個伴絕對不是難事。
日前，Amy出席由黃百鳴舉辦的晚宴，風采依然，腰圍維持21吋，體重僅45公斤，沒半點贅肉，確實保養得宜！一般人認為要減肥就要節食，她持相反意見：「食少咗，其實會令到新陳代謝減慢，我嘅心得就係唔好食鹽，唔食煎炸嘢，反而油就唔使驚，以前我好少食肉，但係近年為咗增加鐵質，我會食啲牛同羊，同埋其實我好鍾意食甜品，冇戒口㗎！」Amy每日堅持做最少1小時的運動，頭半小時會做sit up，然後在屋企跑步。要好似Amy一樣做「逆齡美人」，她分享的一連串健美心得，大家收到未？
