「星夢一姐」菊梓喬忽然於社交平台上將所屬唱片公司TVB Music Group及無綫「除名」，即傳出離巢，不過佢就未有回應，加上公司官網仲見到菊梓喬個名，未知佢星途如何。但係仍然熱愛工作嘅佢，最近就自爆斷腳，今個星期六佢喺順德開騷，雖然有傷在身，不過佢都未有取消演出，如常綵排。
尋日（1日）佢就晒出要靠輪椅出入嘅新片，只見佢喺studio入面要「行樓梯」，片中佢當然唔使自己行，反而見佢由4位大大隻猛男連人帶輪椅抬佢落樓，Hana雖然面露尷尬，但在場人士就笑爆嘴，怕怕醜醜嘅菊梓喬有女王待遇，似乎佢喺公司地位仲保得住。
