胡定欣人緣甚好，今日（9日）42歲生日嘅佢，早前就獲一班胡說八道會姊妹，包括胡杏兒、黃智雯、姚子羚及胡蓓蔚等為佢慶生，胡蓓蔚網晒合照，見佢哋扭作一團，場面溫馨，連唔喺香港嘅李施嬅都透過視像送祝福，並隔空「合照」同框，大晒姊妹情，席間佢哋仲齊齊揸咪唱K，重拾青春情懷！
不過當晚原來仲有一位特別嘉賓，竟然有「小鮮肉」向胡定欣送花兼獻吻，原來係陳山聰囝囝Jaco！眾所周知，Jaco向來對胡定欣都好冷淡，經常請食「檸檬」，今次難得施冧功，即氹得壽星女勁開心，陳山聰留言笑指：「大家冇眼花，今日Aunti Nann大好日子，已經3歲嘅大佬終於主動出擊！sister 祝你生日快樂、 身體健康、幸福美滿、大紅大紫、事業更上一層樓！」
另外，有消息指「胡說八道會」將於12月在美國洛杉磯及三藩市舉行演唱會，網上流出海報，見6女獨欠胡蓓蔚，改為伍詠薇擔任特別嘉賓，引起不少網民熱議：「點解冇最唱得嘅豹嫂」、「真正嘅歌手豹嫂竟然唔嚟？」
