無綫女星朱智賢與男友謝東閔走過偷食風波後，二人鮮有公開晒愛，連合照都少見，早前謝東閔見人時，就自爆同女友冇傾過結婚一事，亦未有拉埋天窗之意，令外界對兩人感情多揣測。不過二人好友、《中年好聲音》參賽者曹敏寶日前就晒出朱智賢同謝東閔嘅親密合照，大家先放心兩人感情仍然穩定，時不時都孖住出巡。當中朱智賢就喺合照下面留言「警告」曹敏寶：「你跪低先好同我講嘢。」曹敏寶則回覆：「你唔好喺度亂噏廿四，嚇死人咩。」似乎好友間都知朱智賢同謝東閔繼續打得火熱。
對於朱智賢疑不滿他將合照曝光嬲爆一事，東網聯絡上曹敏寶，她表示：「我同佢講嘢不嬲都係咁，大家唔駛放大。因為我叫佢地做「師傅」，所以佢就講笑叫我下跪，好似古代嘅臣子咁解咋。放心放心，我哋10幾年朋友，咩都講得出啫。」
