現年36歲的周吉佩（吉吉）爆冷奪得無綫《中年好聲音》首屆冠軍，他在總決賽前接受「蝦頭」楊詩敏和連詩雅的網台節目《絲打圍佬》訪問，大談參賽的心路歷程和港姐太太黃彥欣的關係轉變。
周吉佩追求音樂可謂波折重重，早年他曾瞞着太太簽約唱片公司，後來影響到正職收入，當時太太是正在陀第一胎，令太太對他大失信心，更傷到彼此的信任。二人經常為音樂有拗撬，吉吉為怕被太太指「發明星夢」，在家中都不敢唱歌，甚至不敢出聲，他說：「好似啞咗咁，從來冇喺屋企唱過歌，小朋友都唔知我係唱歌嘅。」
今次參賽亦是先斬後奏，太太是從好友曹敏寶口中得知他參加《中年好聲音》的消息：「我仲記得我嗰陣喺老婆隔籬睇到個message，心諗死喇！」吉吉在比賽中一度被淘汰，之後收到製作組電話，有機會重返節目，他形容太太此時「突然醒咗」：「我個人沉醉喺失落感，電話都唔想聽，跟住我老婆行出嚟話製作組好似搵我返去，佢話嗰下佢覺得原來你條友仔都有人欣賞你㗎喎！」
吉吉直言今次參賽最大得著是「太太180度嘅轉變支持」，他透露與太太在25歲訂婚，28歲結婚，笑言心態上「唔想走寶」。婚後不久便有了小朋友，但同時亦沒有了二人世界，他大呻分房瞓長達七年：「我同我老婆分瞓房七年，好慘啊！我要投訴！因為我太太生咗小朋友後，母性突然大爆發，完全skip咗我，將我啲被鋪掉去間細房，要我自己瞓，佢同小朋友瞓；由嗰日開始分房瞓到今日，七年幾。」
如今大女7歲，細仔5歲，兩個小朋友跟媽媽瞓同一間房，而他就自己瞓很不開心，此時蝦頭和連詩雅忽然發現重點：「不過你哋都都有細仔喎，仲可以製造到細佬。」周吉佩尷尬笑說：「喺梳化嗰啲，哈哈」
