息影神隱多年嘅徐子珊…

息影神隱多年嘅徐子珊，近日現身法國巴黎橘園美術館時被「捕獲」，留有長髮、身形發福嘅佢秒變師奶味，同昔日女神形象大相逕庭，已經洗盡鉛華嘅佢，再有新相流出，更係超近距離嘅相，畀大家睇清女神最新狀態。

上傳新相嘅網友指，因為對方已退隱，佢都冇上去打招呼打擾，但就覺得徐子珊一身素裝都有明星氣質。而佢上載嘅超近鏡拍攝，畀網友清晰可見徐子珊容貌，雖以素顏示人，但氣色不俗，佢喺美術館同友人欣賞藝術品，期間有講有笑，整體狀態輕鬆自然，鬆弛感十足，享受平淡生活之餘，亦比往日更貼地、親民。