羅毓儀（Yuki）在今年3月宣布與拍拖4年男友咪咪（Mike）分手，當時她表示：「幾個月前已經分開咗，因為我哋大家都需要啲時間沉澱，所以冇第一時間通知大家，但大家唔使擔心，我哋係和平分手，再見亦是朋友。」
大個女的Yuki亦專注事業，在有份主演TVB劇《神耆小子》，昨晚焦點落在她身上。劇情講，Yuki飾演的多多甫大話欺騙「迷你倉四子」冼靖峰（Archie）、關曜儁、邵展鵬及羅永健。
不過，由於多多樣子甜美、打扮Trendy身形又弗，再加上被踢爆講大話後以極真摯的「天真孩子眼」及「燦爛笑容」、配以既可愛又可憐、兼無敵甜美的「道歉8連環」，成功冧掂Archie以外其餘三子，更順利「入屋」與四子合作做生意，令Archie頗為不滿。
對於Yuki的甜美道歉8連環，網民亦大為受落，並笑言：「超靚！超嗲！」、「我一定原諒你」；還有網民大讚Yuki美腿無敵、身形超Fit。
Yuki在劇中一改過往乖女形象以「七彩背影」首度登場，談到新鮮感十足的Shocking Pink Highlight頭造型，她坦言很喜歡，皆因本人也很鍾意粉紅色：「要多謝髮型設計師，佢哋畀咗好多心機。我頭髮本身係黑色，而且拍攝《神耆小子》時我有連住其他劇，冇辦法真係去染髮，但因為監製、編劇同導演一致認為多多身為設計師，造型應該鮮明啲，所以最後啲粉紅色頭髮其實係髮片嚟。」
她續指，每次埋位拍攝前，除了要逐片髮片夾回頭上，還要額外花時間紮辮，打造需時。談到長期以牛仔褲及短打出場，Yuki解構指是想配合角色人設及髮型，希望打造出活潑醒目感。
問到牛仔褲數目，Yuki笑指印象中至少有6至８件左右，並透露相關打扮與後續感情發展有關，兼劇透指之後因為一個原因，形象會有180度大轉變！
入行約5年的Yuki一直不乏綜藝及劇集演出機會，只是礙於生得太童顏，在劇集中多飾演學生妹或是女主角年青版，由於不止一次飾演林夏薇年青版，更有「御用年青版林夏薇」封號。
談到今次跳出學生妹框框轉為飾演Trendy大話妹，Yuki坦言接到角色時很開心，也鬆了一口氣：「接到角色時真係超級勁開心，因為呢套劇都算係《下流上車族》之後最重戲份嘅劇！」
她續指：「我覺得自己算係比較幸運，好多謝公司畀咁多機會我，又畀我嘗試跳出學生妹框框。之前一直都有好多台前幕後同埋觀眾朋友擔心我有機會被定型。雖然今次角色年紀都唔算大，但係層次比較豐富，希望可以有突破，畀到觀眾新鮮感。」
