藝人張致恒（Steven）太太雯雯尋日（16日）大爆屋企「畀人搞到」Cut電，斷電後阿仔更加冇熱水沖奶，不停喊，當日稍後Steven「重施故技」上載入數qr code，公開叫人畀錢資助佢哋一家，情況引起大眾關注。相隔一晚，雯雯今日（17日）一早9點幾就再次上載限時動態稱：「多謝真正有心嘅所有人，多謝真正幫過我哋嘅人！ 尋晚凌晨已經一切安好，我唔介意你話我乞兒，我相信冇人會想行到呢步，但經歷完尋日十幾小時，小朋友不幸發燒+嘔，我已經得到我應得嘅教訓。」自爆阿仔發燒、嘔吐，更令人擔心，迫到佢直認唔介意被鬧係乞兒，話自己已經有應得嘅教訓。
佢又強調自己已經開始返工，只係未夠一個月，未出到糧畀佢：「我唔係工作都冇錢，而係啱啱起步未足一個月，所以依家仲係零。多謝真正關心我哋嘅人，亦多謝鬧我哋嘅人，發生嘅我已經有足夠嘅懲罰。」
