黃宗澤、陳豪和馬國明三大視帝即將拍攝邵氏新網劇《執法者們》，今日（2日）在前北九龍裁判法院進行開鏡拜神，三人分別飾演政府三個執法機關。劇中做警察的黃宗澤，與蔡潔傳緋聞已久，今次劇中飾演夫妻，「攞正牌」親熱，在現場二人卻不多交流，黃宗澤反而乖巧，對高層樂易玲照顧有加。
黃宗澤和蔡潔不止一次合作，二人的緋聞傳出已久，今次在劇中仍然有感情戲，黃宗澤笑言：「今次終於有幸、榮幸、升呢做蔡潔嘅老公，再唔係好朋友、知己之類角色，我高攀做佢老公。」被笑指二人「拍拖多時」，黃宗澤扮傻笑說：「係囉，今日先畀佢揀中我，我哋太熟太Friend，喺現場我都盡量諗辦法搞下、整蠱佢令佢NG。」
今次做夫妻，黃宗澤攞正牌跟蔡潔親熱，黃宗澤說：「夫妻間攬攬錫錫梗係有啲，我哋冇乜傳過呢啲緋聞，嗰次傳出我哋都愕然，點解會傳嘅呢。太熟拍呢類戲就唔尷尬。」
馬國明劇中跟宣萱有感情線，但宣萱與陳豪亦會有關係，至於是否三角戀，馬國明不願劇透 。新婚的馬國明可會把握機會，向「多仔公」陳豪取經生小孩的秘訣？馬國明笑言：「佢已經做晒Sample喺度，都唔使特別問，反而係要請教佢，如果將來真係有（小孩），點搵學校要請教佢，我會不停問佢。」
相隔差不多四年再拍港劇的林嘉華，在新劇中飾演奸角，做一個擁有權力與金錢的世界級億萬富翁，林嘉華樂於演奸角。他還表示過去數年，一直有人接洽拍電影或拍劇，但因為疫情關係，他要在加拿大照顧家人而惟有推掉工作。
去年尾，有傳林嘉華與太太婚變，今日出席活動，太太劉寶珍陪伴來打破傳聞 。對於傳林嘉華破產，他立即更正，笑謂：「係話我經濟拮据，冇話我破產，呢啲清者自清，都係一笑置之，亦唔會追究來源是甚麼，有朋友話我知，我就冇所謂，有乜好嬲，佢哋想寫乜都得，但牽連到屋企人就或者朋友我就會出聲。」林嘉華相信朋友了解自己，不會把傳聞信以為真，就算致電老友，大家都不會Cut線拒接聽電話。
