無綫小花何依婷今日於峇里結婚…

無綫小花何依婷今日於峇里結婚，佢早前已率先飛去當地提早打點，而昨晚姊妹團嘅蔡嘉欣及陳詩欣亦已抵達當地，仲大晒打卡自拍相。今早佢哋亦已準備好做姊妹，陳詩欣晒出現場照片，婚禮場地搶先曝光，見新娘房又大玻璃望到花園及水池位置，鳥語花香相當寫意，而佢哋亦喺窗上貼有「囍」字，跟足中式傳統禮儀。

另外，有份參加婚禮嘅好友鄭衍峰今日亦晒出「囍」字，其實佢一早已與陳懿德、馬俊傑等人去到酒店享受假期，見佢哋去完泳池又去海灘，陳懿德仲邊「倒奶」邊整蠱鄭衍峰，玩得非常開心。