早前，受超強颱風「蘇拉」及黑雨影響，唔少圈中藝人屋企都慘變水上樂園，其中蔡卓妍（阿Sa）更喺社交網分享屋企窗邊漏水慘況，情況嚴峻到仲要出動多條毛巾塞住窗罅，認真牙煙。而日前，阿Sa亦再喺社交網晒出2張窗邊擺滿公仔嘅相，並寫道多謝周星馳：「好得意呀，多謝偶像，掂呀！」
從相中所見，阿Sa唔止收到造型趣致嘅電影公仔，仲有好多唔同嘅「長江七號」周邊公仔，加埋阿Sa嘅愛貓合照，認真趣致得意！不過窗外無敵海景雖然搶Fo，不過窗邊就疑似受漏水影響，留低咗唔少抺唔甩嘅水漬。事實上，入行逾20年嘅阿Sa，喺影歌視三方面發展都相當亮眼，加上向來投資有道嘅關係，據悉剩係佢名下就有5個物業，包括紅山半島、海濱南岸、慧莉苑及玫林別墅等，剩係收租就月入20萬，喺圈中知名嘅小富婆。
