去年播出的內地音樂節目《聲生不息．港樂季》大收旺場，當中上位歌壇小花炎明熹更成功打入內地市場，同天后容祖兒等平起平坐開萬人騷。繼年初播完《聲生不息．寶島季》，依家有指《聲生不息．港樂季2》將於10月開錄，網上就流出擬邀12位常駐嘉賓嘅招商訊息，當中就有6位歌手剪影，竟被萬能網友破解，疑有份參與第二季嘅歌手分別有謝霆鋒、黃綺珊、容祖兒、宋亞軒、鄧紫棋同周深，似乎將會係鐵腳人選。
有指今次比賽會有6組香港加內地常駐歌手，每輪仲有一組觀眾推薦嘅年輕歌手作為飛行嘉賓，人多勢眾令大家耳朵懷孕。而標籤中有一個「受爭議的香港頂流」，令唔少網友猜測MIRROR人氣成員姜濤將有份參賽，尤其今年姜濤於中港兩地受到唔同爭議，更被封「香港頂流」，傳到似層層。
