藝人陳法蓉（Monica）現身劇集《一舞傾城》宣傳。對於該劇第二周收視微跌，最高收視僅得19.1，她聞言即回應：「我冇留意香港收視，但我知道內地個收視成績唔錯，超過一部好犀利嘅電視劇添，同埋我好多朋友都話有追睇。（但有網民覺得劇情有啲老土。）我睇晒成個劇本，都比之前改動咗好多，想反映上世紀夜總會背景故事，包括咗古惑仔同夜場姊妹情，已經做到想突顯出嚟嘅嘢，本來幕後工作人員想劇情搞笑啲，不過有啲場口，包括我流產，都搞喊好多人。」
提到好姐妹洪欣與丈夫張丹峰宣布「復合」且結伴開直播，但遭網民揶揄為錢扮恩愛。Monica則表示：「首先多謝大家關心洪欣，至於件事係點樣，佢已經好詳細講咗，我就冇補充嘞。（覺得好兒戲？擔心佢？）都係冇嘢補充，我有同佢傾過，佢都話唔使擔心佢，同埋話詳細佢自己會解釋，咁等番佢兩個講啦。」
