台灣歌手徐懷鈺成為內地節目《乘風2023》「風頭躉」，本身賽前以為佢會好似上季王心凌咁再次嚟個「現場級」爆紅，點知依家佢黑料滿天飛，繼早前被指佢偷懶求其，表現失準忘記舞步，累及隊友賈靜雯及陳意涵等，仲有傳佢為接商演而放棄排練，依家再被指控佢故意賣慘！
喺最新一集中，公布第一次舞台公演淘汰結果，徐懷鈺以第27名成績獲得最後一個安全晉級名額，佢聽到黃曉明嗌自己個名時，即表情錯愕及落淚，哽咽話自己一直有愧疚感：「我覺得我對不起所有的姐姐！」即被網友寸佢故意賣慘博同情。
相反，當黃曉明宣布當中4位姐姐被淘汰後，其他姐姐都紛紛離座，上演各種抱頭痛哭及安慰，唯獨徐懷鈺一個人坐埋一邊，靜靜地望住離別情景。網友即再寸佢唔係自己做主角嘅鏡頭時「裝都不裝了」、「可能是心虛才不敢跟大家互動」、「不重視節目」，但亦有粉絲不捨地留言「非要針對死徐懷鈺嗎？」又有人質疑佢有「社交恐懼」，而「#徐懷鈺一個人坐在角落裏#」一度成熱搜話題。
