女星江嘉敏（Kaman）憑苗條身材及清純學生Look成功入屋，深受觀眾喜愛。可惜隨着身材逐漸圓潤，被網友嘲笑為「脹爆師奶」外，更被多位監製下令要減肥！如今收身有成嘅佢，亦不斷喺社交網大派福利，早前嘅一套黑色小背心更側乳外露，相當震撼眼球。
而收身有道嘅江嘉敏，昨日（12日）亦喺社交網分享減肥心得，除咗表示畀人讚瘦咗成個碼外，更感謝陪自己一齊減肥運動嘅朋友，特別係細妹：「每次肚餓好想食零食，我妹就會勁惡咁啤住我！佢哋仲會陪我夜晚跑步。」最後江嘉敏亦晒出2張素顏相，證明自己唔再係「脹爆師奶」嘅同時，辛苦減肥嘅成果都獲唔少網友Like爆：「第一張相成個薛凱琪咁！」、「唔好講笑，真心素顏仲靚，開始有健康美嘅氣質！」、「素顏都咁靚，好羨慕！」、「Fit咗又靚咗。」仲有網友誇張直言：「直頭後生到成個學生妹咁！」睇嚟江嘉敏嘅辛苦努力終於得到回報。
