影后周迅自失婚後，感情生活都未停過，去年佢就同內地樂隊「馬賽克樂隊」吉他手卓越被拍到拖手返飯店，令相差13歲嘅姊弟戀見光，雖然近日有傳佢同好友陳坤於西藏結婚，但其實周迅同卓越仲係打得火熱，近日更被目到二人罕有地冇遮冇掩咁拍拖食飯，與朋友聚餐後，卓越更主動對女友攬肩摟腰，愈愛愈公開。
一身民族風打扮嘅周迅，當晚笑容滿面，不過行到一半，周迅就當街跪地，同身邊一名小女孩跪喺地下，佢仲向小女孩示範行跪拜禮，又一度伸手幫小女孩整理鞋帶，然後一大一小咁齊齊對住友人跪拜叩首，卓越就同朋友踎底睇熱鬧，令路人為之側目。
