藝人陳自瑤（Yoyo）擔任連詩雅伴娘，梁諾妍及黎紀君等任姊妹團，問Yoyo是否收了131萬4千開門利是？她否認：「封利是OK，但個數冇咁誇張，佢係畀港幣嘅。」提到另一好閨蜜黃翠如未能參與婚禮，她解釋：「係，因為佢去咗拍旅遊節目，其實佢好早已經度咗期出席婚禮，但有時要飛就飛，要就成個拍攝組，唔係佢一個人可以話事，所以佢都好無奈同唔開心。（會唔會代佢送禮物？）佢會同詩雅溝通，我就送咗人情，仲有其他嘢，呢個係秘密。（會唔會催佢生小朋友？或者叫你個女幫佢跳床？）要搵個細啲嘅小朋友跳，我嗰個太大，我知佢都想生，但閨房嘢，佢哋自己處理，我好戥佢哋開心，希望佢哋好快有好消息。」
講到接新娘時有否準備辣招招呼新郎及兄弟團，Yoyo透露因為詩雅很喜歡美少女戰士，所以就安排新郞及兄弟們穿上水手服載歌載舞：「不過我都覺得今日便宜咗新郎，佢玩玩吓坐低咗，其他遊戲由兄弟出嚟頂，連啲兄弟都睇唔過眼要佢做啲高難度動作，所以今次玩得算係比較溫和，大家都錫住新郞。」
