無綫熱播劇《隱形戰隊》出街後反應不俗，除了劇中多位主角表現出色之外，就連在第8集出場的殺手羅孝勇(Sheldon)都好搶戲，他與馬國明在𨋢內槍戰一幕非常緊湊，無論眼神與身手都大獲讚賞。近年被指黐影壇新貴老婆王丹妮金糠的羅孝勇，《巨星2》出身浮沉多年都紅唔起，拍劇專做閒角，去年赴澳洲進修欲5年後轉行做脊醫，今次有望彈起曙光初現。
羅孝勇在《隱形戰隊》第8集的演出贏盡好評，尤其𨋢內與馬國明槍戰一幕，製作與演員同獲讚賞。飾演殺手陳環的羅孝勇，欲在醫院運走案中重要人物受重傷的林景程，他與追入𨋢的馬國明、唐詩詠先來個眼神對峙，之後羅孝勇一手掀起被單、一手掹槍射向馬國明，對手身手敏捷閃開並還拖，結果兩位男角同時獲讚有型有款：「個殺手勁好打，應該畀多啲機會羅孝勇」、「羅孝勇的確唔錯」、「羅孝勇其實幾靚仔」、「羅孝勇好抽得」、「馬明好少可咁好身手」。就連製作方面都獲讚拍得細緻精彩，劇情非常緊湊。
羅孝勇繼《法證先鋒 V》的「暖男」黑幫大佬後，演繹型格冷血殺手再獲好評，所有動作場面都極度有型，難怪監製文偉鴻亦大讚：「從未見過咁有型嘅羅孝勇」。對於獲監製讚有型，羅孝勇受訪時謙稱謂：「我十分多謝 Jazz 監製同拍攝團隊對我嘅幫忙同照顧，亦都好多謝武師同我一齊分析動作上點樣可以配合鏡頭打得更好睇。今次好難得，因為終於可以拍到自己好鍾意嘅動作戲，我亦都覺得係緣份，因為咁啱我參加完《明星運動會》拳擊賽攞咗冠軍，當時為咗個比賽我都操練咗好一段時間，所以無論體格定精神上都比較 ready 去拍打戲。」
談到大獲好評的𨋢內槍戰，羅孝勇謂：「其實呢場戲有個難處，因為我件護士衫係短袖，手臂唔可以加保護墊，真係所有打鬥場面都要硬頂，但為求有真實感，我都豁出去希望盡力做好，最後喺唔係好多 Take 之下順利完成。不過返到屋企兩隻手臂其實瘀晒，依家睇返原來大家咁鍾意呢場戲，咩都值得啦。」
羅孝勇於澳洲出生及長大，畢業於西澳大學經濟系，10年回港參加《超級巨聲2》，決賽當晚自彈自唱演繹自己創作的英文歌《Speechless》，贏得評判一致讚賞，最終以170.5分奪得季軍，之後簽約無綫，拍劇之外同時擔任明珠台主持，14年簽約星娛樂，以唱作人身份加盟樂壇，推出首張個人EP及第一首派台歌《Your Love》，在無綫期間羅孝勇明顯不獲力捧，16年唔續約外闖，星途浮沉多年，19年組成樂隊 Harbor Homme推出英語歌曲《A Song for Her》。 近年羅孝勇都幾運滯，17年在旺角當街遭一輛私家車衝燈撞到，導致腰椎骨位置骨折，19年他又在社交網上載手指縫針片段，原來手指生軟骨瘤令骨骼變得脆弱，任何撞擊都可能導致骨折，所以做手術切除並用骨水泥固定，再放入一支金屬棒，直到骨頭愈合為止。
20年羅孝勇重返無綫。簽約兩年共拍8部劇集，當中在《飛虎3壯志英雄》及《法證先峰5》的角色都好有型，不過始終都係彈唔起，去年約滿後羅孝勇再度離巢，並有意另覓發展，他在社交平台公布決定重返校園，獲澳洲梅鐸大學Murdoch University取錄進修脊醫學士學位課程，有望5年後轉行做脊醫。現時羅孝勇為邵氏兄弟旗下藝人，不時返港拍劇。
文章版權為新傳媒集團所擁有，原文請按： 网页链接
