藝人游嘉欣（游游）今午（10日）現身花卉展，吸引大批龍友到場「獵艷」，她更即場跟師傅學影花，事後大叫好玩。受訪時她指自己首次涉足花奔展，又自爆愛收花：「收花係件好浪漫嘅事，不過我未收過異性送嘅，反而之前有個開花店嘅女影迷，自己親手整咗摘花送嚟我屋企，搞到我好感動。（送花追你係咪易啲？ ）我諗係，起碼氹到我開心先啦，機會加一成！」
近日忙於拍飲食節目的她，表示寓工作於娛樂，日日有好嘢食，而下月她將回歸劇組，夥拍吳偉豪拍攝新劇，但拒絕透露戲中關係：「遲啲再同大家講。（咁今次有咩準備工夫？ ）戲內我要揸車，我都啱啱考完筆試，但未開始正式學車，所以今次都應該係綠布景前扮揸。（跑車有信心？ ）都有，因為我份人比較謹慎，會係好安全嘅道路使用者。（排咗幾時考路試？）8月。（依家肥佬嘅話再排考試好耐喎。）唔好畀壓力我，我預自己一Take過。（跑到即刻買車獎勵自己？ ）又唔會，我哋平時收工比較攰，冇乜精神揸車，其實我都係考個牌嚟傍身啫。」
