《新四十二章》中，朱家三兄妹雖然沒有任何血緣關係，但那份情誼來得更加真摯。林景程飾演大佬朱古力，超緊身摔跤手造型，角色性格喜感十足，如同早前的劇集角色一樣，每次出場都深受觀眾的喜愛。景程坦言性格被動、自卑，工作上能夠得到觀眾的認同和喜愛，甚至走到頒獎禮獲得提名，實在感到榮幸之至。
景程屋企有一個哥哥，這次演朱家大佬，有一位外籍弟弟同生鬚的妹妹，夠晒玩味，提到合作，回味無窮，「我哋三個好有火花，同龔嘉欣早有默契，之前合作拍過《殺手》及《香港愛情故事》。反而易宇航係第一次合作，甚至未曾接觸，只聽說佢喺《好聲好戲》聲演，當時覺得佢好搞笑；拍攝時嘗試同佢加深認識，我聽唔明佢講嘢，七成對話都要靠估，擔心溝通會出現問題。」他笑言幸好劇本在手，過程比預期來得順利，同時慘被摔跤手考起，「造型絕對係從演以來最大膽，簡直晴天霹靂！摔跤手穿底衫合情合理呀…最後都係決定我唔可以著底衫…呢個決定係啱嘅，因為播出嚟喜感大好多。」
過去的2022年，景程有九套劇集先後出街，其中以《下流上車族》的反骨仔最令人留下深刻印象，讓他一次過入圍「最佳男配角」和「飛躍進步男藝員」獎，他自嘲：「成日擔心觀眾會唔鍾意睇我個樣？我質問自己點解會喺鏡頭上呈現呢個樣呢？點解硬係唔識得遷就角度？觀眾緣方面我只能夠講係幸運，長輩級嘅觀眾都特別鍾意我，有一次出街食飯時，一位唔認識嘅長輩突然拎走我張單，佢話好鍾意睇我演戲，讚我演得好好，要幫我埋單…當然唔係咁好啦，我就搶番張單！人生中偶然遇到呢種事，真係好令人鼓舞。」他坦言入圍對自卑又缺乏信心的人而言，絕對是一個大大的肯定，他不會因為失落獎項而氣餒，反而努力糾正演技，去面對將來更多不同角色的考驗，「咁先對得起所有支持嘅人。」
景程拍劇之餘，還要應付物理治療師的工作，時間分配絕不容易，他一度面臨崩潰的狀態，「仲記得當時拍緊《下流》，拍劇同物理治療工作都特別忙，加上屋企人嘅飯局要應酬，當然家人聚會唔應該講成係『應酬』，當你一啲時間都冇，仲要出席飯局時，就會感覺係負擔，當呢種感覺出現時，我就知道出事喇！當下崩潰，係好攰 ，我又唔習慣同家人分享心事，唔希望影響佢哋。當時好誇張呀，我係突然會眼眶濕透，嚇親佢哋。」景程說只能將情緒發洩在角色上面，拍劇令他紓壓，感恩的是家人、太太由不接受到慢慢支持他，令他不感孤單，「家人呢，唔知係咪已經抱放棄心態？還是真係支持我？無論如何，佢哋支持，我就舒服得多，路要自己一個人行，同有人從旁打氣加油，絕對係兩回事！」
在配角位置站穩腳步，景程是否期待當男主角的一天？笑言：「男主角真係唔敢諗！我始終覺得自己樣衰，好多小動作仲希望可以改進，喺咁多瑕疵嘅前題下，我唔敢奢想男主角，當然公司畀機會我嘅話，一定會接！演戲時壞習慣一定要改，令觀眾容易接受，成為更好嘅林景程。」
