有「最索星二代」之稱嘅關禮傑愛女關楓馨前年認愛紋身男Dancer Tommy，但因對方多段戀情時間線存疑，被網友封「世紀壞男」，不過關楓馨並冇因而分手，繼續同Tommy拍拖，依家仲疑似有進一步發展，因為關楓馨尋日（28日）於社交網無預警貼出婚紗照，獲大批圈內外人送上祝福！
佢上載多張婚紗照，以白色長袖喱士拖尾、望落似足婚紗嘅night gown上陣，中門大開，力谷豐滿上圍，真係又性感又唯美，又以似是而非歌詞留言：「為了不必妥協，失憶我也可以，從此，再好好過日子。」圈中好友郭柏妍、蘇韻姿、陳婉衡及黎寬怡等紛紛激讚索爆，而袁偉豪和孔德賢則分別送上祝福，關楓馨就回覆袁偉豪：「will be a single bride for a while（會做一陣子單身新娘）」終於解開閃婚疑雲。
