今年賀歲片大戰相當緊湊！其中《飯戲攻心2》可謂聲勢十分勁，開畫5日已成功宣布衝破2,000萬票房，成績驕人！不過有讚亦有彈，有觀眾表示睇完有啲失望⋯⋯
不少網民對於《飯戲攻心2》都有所期待，事關《飯戲攻心1》成為唔少港人心目中其中一套非常出色的港產電影，對白出色劇情寫實貼地自然流暢，打破一向賀歲片特質。不過有唔少觀眾指出今次第2集出現返傳統賀歲片弊病，用群星堆砌，劇情轉接夾硬，更形容新加入的Jeffrey「仲要扮低能萬人迷」睇到好尷尬，令人出戲，今集將前作的優點大大削弱，網民認為似乎因為今集無咗黃子華，感覺導演想用群星「挽救」。
《飯戲攻心1》笑中有淚，自然流暢，子華神對白句句都係金句。不過今次笑位就被指刻意尷尬，而且指今次導演太「貪心」，金句、大道理過多，「塞太多嘢入去」出現反效果，2個鐘睇到4個鐘咁，觀眾現疲累感。「好多人已講佢太貪心，塞太多野落去，講道理我可以，但有時真係做做下感情戲都要忽然彈幾句出嚟真係非人味同出戲，一套戲只適宜一兩個緊扣題旨的金句就夠」「第一日去睇，全場識笑只有一兩次，冇全埸拍手 」「總括來說就是兩頭唔到岸，搔不着癢處」「第二集沒有了香港情懷，只有堆砌式笑料但又唔係幾好笑！」「套戲長達兩個鐘但我覺得自己好似睇左四個鐘咁，戲院全full企但兩個鐘得零星笑聲！」
文章版權為新傳媒集團所擁有，原文請按： 网页链接
