無綫小生張振朗早前趁完成劇集《反黑英雄》四圍吸金，繼與拍檔龔嘉欣飛到馬來西亞登台，日前則留港為某地產商擔任年度晚宴壓軸嘉賓，密密接騷可謂荷包脹卜卜，準備過肥年。而晚宴上筵開過百席，當振朗出場時即全場歡呼，及後他一口氣獻唱3首歌曲，期間走落台與賓客互動，既握手又要求自拍，振朗亦來者不拒，照單全收，並大呼好爽！
振朗受訪時直言對是次表演也不敢怠慢，事前亦特別練歌：「現場啲朋友仔好熱情，佢哋嘅歡呼聲帶畀我好多信心，希望之後多啲機會可以同唔同嘅觀眾近距離接觸。(新年會唔會去旅行？)新年會留喺香港陪家人，應該唔會出埠，但過完年就想出去充吓電，因為之前一直開工，都有成大半年冇休息，所以想出走幾日休息吓啦！」
