32歲G.E.M.鄧紫棋北上發展多時，早前特意回港擔任國際邁亞密（Inter Miami CF）與香港隊表演賽的壓軸表演嘉賓，帶來英文和西班牙歌大獲網民激讚超水準，亦令外界表示期待G.E.M.回歸香港樂壇！G.E.M.順勢在IG玩Q&A與網民互動，更透露之會返港開演唱會，甚至還講埋細節……
G.E.M.鄧紫棋自擔任國際邁亞密（Inter Miami CF）表演賽的壓軸表演嘉賓後，被唔少香港粉絲問到幾時返香港搞演唱會，G.E.M表示一定會返嚟開，不過想等啟德體育場完工。其後昨日（6日）又同網民大玩你問我答，被問到係咪要等到2025年時，G.E.M.回應希望可以再快啲，而點解揀啟德體育場而唔揀紅館，G.E.M.表示因為紅館個期太爆，而且佢個LED 20米高，如果揀紅館就要縮細成套舞台了。
G.E.M.鄧紫棋是最年輕在紅館開個唱的香港女歌手，她於19歲時，在2011年5月於紅館舉行一連3場《Get Everybody Moving》世界巡迴演唱會，同年9月再在紅館加開2場紅館個唱，成為在紅館開5場個唱最年輕的女歌手。她對上一次在紅館開騷已經要數到2017年9月，當時她共舉行3場《G.E.M. Queen Of Hearts 世界巡迴演唱會》，至今已經接近7年未有回港在紅館開演唱會，令香港歌迷等到頸都長！
唔少網民對於G.E.M.鄧紫棋回歸開騷都表示支持，認為G.E.M.真係有台型又有實力，夠晒料開咁大個場：「好波 到時搶VIP飛」、「佢有資格啦」、「搵其他人都唔知有冇能力填滿個場」、「想同佢講聲加油」。不過都有網民擔心G.E.M前公司問題，唔知會唔會因版權問題，搞到G.E.M.無晒歌唱！「佢前公司出咗聲明唔畀佢喺香港唱喎」、「佢開都無得唱自己歌」，不少網民都表示擔憂。
鄧紫棋的香港演出可謂寥寥可數，上一次她在香港的公開演出，是在去年台灣情歌天王周興哲（Eric）的紅館演唱會中擔任嘉賓。今次在G.E.M.在球賽完場後壓軸登場，雖然當時已經有不少球迷離場，但G.E.M.依然非常專業，超水準一連唱出英文歌《Amazing Grace》和《Gloria》的西班牙版本，連碧咸都站在場邊捧場。
文章版權為新傳媒集團所擁有，原文請按： 网页链接
