TVB劇集《新聞女王》第12集，佘詩曼多次向何依婷進行試探，今晚將當住她面篤爆與馬國明有地下情，更怒極霸氣質問何依婷：「我都想聽吓你可以點兜。」兩人對手戲勁多，之前更傳出她們不和，佘詩曼早前受訪就親自解話⋯⋯
訪問初時，佘詩曼同何依婷一直有講有笑，阿佘對於劇集有好成績更表示：「好開心，監製差唔多每日都會喺group 報收視鼓勵我哋，大家都好興奮！」何依婷亦回應：「係呀，大家一齊咗幾個月，見到個成果都係大家喜歡，覺得好開心！」
講完收視，佘詩曼突然決定唔答問題住，「Man姐上身」先為一件事解話！何依婷當場反應不及，呆了幾秒。阿佘續說：「我而家唔答你哋啲問題住啦！我要平息吓先啦，做咩話我哋不和！咁搞笑嘅！我都想問你，點解會咁？何依婷！」
何依婷被點名回答，即笑住講：「唔知喎，佢哋問我，唔係我講，（佢哋點解咁問你？）佢話我哋啲訪問有火藥味呀，但其實Man姐講笑。」佘詩曼爆笑指：「喔，因為我太入戲啦！」何依婷再補充：「我認識嘅佢（佘詩曼），佢係講笑，大家係咪get錯咗！」
佘詩曼打圓場說：「可能睇嘅觀眾太投入啦（話我『得』住佢）因為個主持位置，哎呀，好無辜呀我，下次叫主持企中間，好煩呀！」兩人全程笑住澄清，輕鬆粉碎不和傳聞，Man姐果然好嘢！
文章版權為新傳媒集團所擁有，原文請按： 网页链接
