2018年港姐季軍丁子田早前喺意大利嫁畀有「頂級時尚富豪家族貴公子」之稱嘅集團太子爺吳杰龍（Paul），正式踏入豪門做少奶奶，而嫁夫隨夫嘅佢目前亦淡出幕前，轉戰地產公司擔任物業顧問，並同家人移居上海。雖然丁子田已經淡出幕前，不過仍會透過社交網同粉絲分享生活點滴，而日前晒出靚靚自拍相嘅佢，即使係居家Look，依然相當上鏡外，豪宅嘅內部裝潢亦意外曝光。
日前，丁子田喺社交網晒出幾張喺屋企睇電視嘅相，只見梳化巨型得嚟，連電視都寧舍大過人，據悉丁子田所住嘅翠湖天地位於上海市中心旺市地帶，深受富豪及藝人歡迎。相中可見，丁子田嘅豪宅裝修行黑白簡約風，個性十足外，客廳空間亦相當闊落，剩係梳化已經可以容納近十人外，仲擺咗張貴妃櫈及兩張茶機之餘，仲有大型電視及大型組合櫃，擺完咁多傢俬都仲有唔少位剩。而佢身後則擺有一張可以坐約十人嘅長餐枱外，隔籬仲擺咗書枱方便工作，另一邊嘅大陽台亦擺有戶外傢俬，落地玻璃嘅設計更係採光度十足，認真富貴。
