台灣舞王羅志祥同前女友周揚青2020年毀滅性分手，當時周揚青跳爆羅志祥同當時其公司旗下藝人、「蝴蝶姐姐」愷樂介入，發展不尋常關係，愷樂即引嚟「小三」罵名，網絡罵聲排山倒海炮轟，愷樂當時雖曾發文向周揚青道歉，但演藝工作全面停止，同圈內好友亦斷絕聯繫，至今仍似足人間蒸發。
不過近年曾傳出愷樂秘婚，離開台灣嫁畀一名上海醫生，做醫生太太，但始終未獲證實。如今再有台灣媒體聲稱，接獲可靠消息來源，指出愷樂唔單只結婚，仲已經歷婚變，離婚後亦已靜靜雞返咗台灣，甚至有意復出。知情人士未有講明婚變原因，僅暗示愷樂「一個人很可憐」，無依無靠，亦好擔心未來何去何從，暗示愷樂婚後過得並唔如意。對比因分手而由網紅變藝人嘅周揚青、復出後重奪「舞王」人氣嘅羅志祥，愷樂只得到部分網民嘅憐愛，指佢係事件中最慘受害人。
台媒就愷樂閃離一事詢問同佢有20年多交情嘅藝人李岳，佢僅表示不便幫好友作過多回應，只係話同愷樂私下有聯繫：「就是平常的聊天跟關心而已，身為學長一直都盡自己能力關心她。」
