向來走實力路線嘅「茶葉仔」，對演戲充滿熱誠，就算大嚿金錢利誘，都不為所動，踏實做好演員嘅工作。即使角色唔一定次次都係擔正男主角，但佢演技出色冇人會質疑，所以近年喺影圈愈撈愈掂。
早前，「茶葉仔」又有份拍一部電影，戲中飾演反派大惡人。東姑聽講，佢呢次入戲又好似上晒身咁；更加令對手措手不及，甚至導演、幕後人員都被佢嚇親。
話說戲裏面有一場戲，講「茶葉仔」要向一名女演員施暴，而影帝級演技嘅佢，一到場果然唔係人咁品，離遠已經feel到佢股殺氣。埋位前，佢更加一粒聲都唔出，自己坐埋一邊，似係喺度培養情緒，搞到全場都冇人敢埋去惹佢。
場戲就係講「茶葉仔」粗暴咁拖個女演員入房，繼而強姦對方。當導演一嗌camera，佢真係忘晒我咁，忽然獸性大發，二話不說，就扯住瞓喺地個女演員嘅頭髮，硬生生咁拖個女仔入房，逼真到嚇親在場所有人之餘，佢仲大大力閂埋度門，嚇到女演員反應唔嚟，可憐隻腳更加縮都縮唔切，畀度門夾親，結果女演員隻腳搞到受傷，第二日仲要睇跌打添。
之不過，雖然「茶葉仔」為場戲拍到咁出力，以及女演員無辜受傷，可惜部戲上畫時，東姑竟然發現呢場施暴戲被剪走咗，無緣畀觀眾睇到「茶葉仔」嘅演技大爆發，認真嘥料喇！
