無綫台慶劇《羅密歐與祝英台》日前一集，講到黃碧蓮（Linna）飾演的謝姑娘向陳豪飾演的萬事通/梁山伯獻吻，令不少觀眾都睇到勁肉緊！原來黃碧蓮已加入無綫9年，因為一個原因，而獲同事封為「Mini香香」。
劇中社工謝姑娘（黃碧蓮飾）對萬事通（陳豪飾）一早心心眼，為了表達愛意，先後六連環出招擄獲男神，包括送情侶水杯、送外賣、強調單身、悉心打扮、無限冧樣及主動獻吻，其中獻吻一幕不但嚇到萬事通「紅都面晒」，網民亦睇到嘩嘩聲，除搞笑指黃碧蓮是「進擊的謝姑娘」，又大讚她靚女：「仲靚過參選嗰陣」！
談到與阿Mo（陳豪）Kiss場口，黃碧蓮笑指有事先向Aimee（陳茵媺）「自首」：「我係第一次同前輩拍Kiss戲，咁我同Aimee都係加拿大女仔，所以拍呢場戲之前我都有同佢講笑話：『唔好意思，我要錫你老公』，佢都喺度笑，仲話：『It’s Ok，Go Ahead』，我聽完就冇咁緊張。」
黃碧蓮又指拍攝當日Aimee亦有在場，但二人未有碰面，並謂拍攝時台前幕後都表現專業：「大家正式開始前會傾吓咩角度拍同點打燈，所以我都好快投入到。嘴阿Mo嗰吓我哋都要做好多練習，因為劇情係話我見到佢嘴角有醬汁，原本我想幫佢抹，但我哄埋去時佢誤會咗所以瞇埋眼，咁我先會想Kiss佢。」
黃碧蓮又分享搞笑拍攝花絮：「因為導演話佢唔嗌Cut我唔好停，咁我就有個Take哄到好近好近，但導演未嗌Cut，我就掂住咗阿Mo嘅鬚根，好拮拮，我個心就係咁諗點解仲未嗌Cut嘅。」黃碧蓮更預告稍後劇情中，她將會有另一場Kiss戲！
現年32歲的黃碧蓮與「香香」岑麗香同樣來自溫哥華，並曾在2012年參加《溫哥華華裔小姐競選》中奪得最上鏡小姐獎，因此獲同事封為「Mini香香」。黃碧蓮畢業於英屬哥倫比亞大學心理學系（兒童心理學），2012年參加《溫哥華華裔小姐競選》，但最終三甲不入，只奪得最上鏡小姐獎，到2014年她來港參選《香港小姐競選》，當時曾被傳媒封為「加國林熙蕾」，但最終大熱倒灶，在落選後入讀無綫藝員訓練班，正式入行，並由主持兒童節目做起，到現在主要擔任明珠台節目《港生活·港享受》的主持工作。
文章版權為新傳媒集團所擁有，原文請按： 网页链接
