女星戴祖儀（Joey）近日憑無綫熱播劇集《香港人在北京》人氣急升，昨日喺社交網大派福利，分享一條「滑水蝦碌片」畀網民欣賞，並寫上：「聽講我哋套劇成績很不錯耶。咁係咪要回饋啲福利比大家啦？睇埋今晚嘅成績先。」佢以長袖上身泳衣及長袖泳褲上陣，露出纖腰兼蜜桃臀。喺滑水片段中，見到佢捉緊繩索兼一臉自滿地滑水，怎料未幾已經跌入大海，場面搞笑！不過有網民卻嫌未夠喉，留言要佢穿上水著派福利。
喺接受東網訪問時，被問到上載爆笑蝦碌滑水片，佢表示:「我個人生不嬲都係一個笑話，今次只係第2次玩Wakesurf，上一次已經係成兩年前，根本完全唔記得晒點樣滑，其實我都滑到一陣嘅，只係每次跌都好有喜感，所以淨係cut啲跌嘅片段畀大家睇。」更指前日出海玩Wakesurf多次跌落水，結果玩咗40分鐘就夠皮:「我要抓緊夏天的尾巴，第2日都準時起身開劇，但就腰酸骨痛到依家，條頸好似瞓捩頸咁，同人講嘢唔可以扭條頸，要直視。」
佢又指現時正構思出純影集，想試下水睇大家嘅反應，若然反應好就有機會喺今年內推出，問到何時再開劇?佢就透露:「今日都要為新劇試造型，預計11月同時開3劇，到時會好充實。」
