第36屆中國金雞獎於11月1至4日舉行，早前網上曾流出疑似入圍名單，原來都係假嘢，今日（14日）大會終於公布入圍名單，當中奇幻史詩片《封神第一部：朝歌風雲》提名9項最多，梁朝偉更係首次入圍金雞影帝，同影帝級內地男星黃渤一爭長短，其主演諜戰片《無名》共提名8項！
《無名》今次同《封神》形成雙雄爭霸局面，26歲內地頂流偶像王一博以《無名》角逐「最佳男配角」，其參與演出嘅另一電影《長空之王》亦有5項提名，粉絲興奮叫好，惟有網友質疑佢實力，指其流量有可能係助佢入圍嘅原因之一。
不過上屆金雞影帝朱一龍主演嘅懸疑片《消失的她》、由張藝興主演嘅詐騙題材口碑之作《孤注一擲》，皆無任何入圍項目，被不少網友視為遺珠。另外，惠英紅亦憑《我愛你！》入圍影后，反而早前流傳嘅周冬雨、劉浩存等全部冇影；曾奪金雞獎影帝嘅內地男星鄧超，今次就入圍最佳導演獎，令人喜出望外。
