陳奕迅昨晚於澳門展開其9場的《FEAR AND DREAMS 世界巡迴演唱會-澳門站》頭場，觀眾反應熱烈，十分成功。疫情過後再次踏上演唱會舞台的陳奕迅都收曬火，少有在舞台上鬧歌迷，不過昨晚talk位期間就發生小插曲，被觀眾命令式叫他講國語，令他黑面鬧足該歌迷成分鐘…
昨晚演唱會Talk位時，Eason本來很開心問觀眾，「你地係來自澳門？有幾多人來自澳門」全場即歡呼，在場亦看到不少來自其他內地城市的粉絲。Eason正講到慶高采烈的時候，突然有一位觀眾以命令式口吻大叫：「講國語！」接著又有人叫：「講普通話」，令Eason瞬間黑面。
轉數快的Eason先以古靈精怪的表情加泰文打招呼作回應，然後改以英語講「I love speaking whatever the way and language I want（我喜歡用我想要的方式和語言說話）」，全場即時歡呼。 之後Eason再用普通話回應觀眾：「你可以說『麻煩你說國語』就比較好聽一點了，但你『是講國語！』我不是不會講國語，我可以講國語，說得很流利也可以，你可以要求『多謝、請、麻煩你』。」 Eason 之後又指：「nonono，don’t get me wrong，有人如果話『Speak English！』我都是『Shut up！』其實你聽唔明咪算囉。」在一輪歡呼及掌聲後，他又指，「我唔知你哋鼓咩掌，如果 David Bowie 喺到唱，你會唔會叫佢講國語？講廣東話？奇怪！我都係塞返耳塞算。」 全程鬧足成分鐘！
對於今次 Eason不肯被命令講國語一事，即時惹來內地網民熱議，亦以「陳奕迅澳門場被要求說國語」為題登上熱搜。不過今次內地網民反應非常意外，大部分網民都認為去澳門講廣東話冇大問題，反而要求在講廣東話的地區講普通話的歌迷先有問題：「在澳門開Show講粵語都是天經地義，請尊重每一個地方的Local Language」、「粵語區講粵語也不行了？」、「跑粵語地區看，然後還要人家講國語，無語」；亦有澳門網民留言指：「我哋澳門不嬲講粵語！聽唔明不要來」
此外，昨晚在舞台上曾經向多次想講整個演唱會想帶出的意義，但多被觀眾亂叫打斷。多年前曾經因為歌迷打斷唱歌而發脾氣的Eason，今次就冇發脾氣，反而平心靜氣呼籲演唱會觀眾不要太熱情：「我知你哋特別熱情，但係我個騷，每隻歌都係一個連貫性舞台劇咁，我唔會俾你哋影響到我，我要好集中去用歌講故仔。」然後他又被觀眾狂叫打斷，無奈話：
「你再熱情我都係咁上下，其實我聽唔得到你哋叫緊咩，我所有熱情都留咗係唱歌到，依家係演唱會，唔係傾計會，我唔可以同你一個人講嘢，而唔理全場其他觀眾….我耳仔好敏感，我同你講緊嘢，其他聲又來，我聽唔到，我會好煩…..」
文章版權為新傳媒集團所擁有，原文請按： 网页链接
