時間最公平，也是最無情，不會為誰停留。
當〈水瓶座〉或〈劃火柴〉還在你的播放清單之中，陳曉東於這兩年間，已推出了幾首新單曲，包括正在熱播中的〈專注〉。
轉眼之間，明年就是陳曉東入行的第30個年頭，他不諱言：「我經歷咗好幾個年代，由唱片到盜版，再到MP3，𠵱家全Digital，同我一樣，經歷咗唔同嘅階段，但喺每個階段，我都想搵一啲Innovation（創新）。」
一度被指「走樣」 ，但48歲的陳曉東，招牌大眼依然炯炯有神，臉上雖有點點的歲月痕跡，訪問前一天才由銀川搭飛機又搭船返港，其狀態仍甚佳。
「出道嘅時候，我有好多包袱，類似𠵱家嘅『偶包』，會好介意其他人對我嘅想法。𠵱家我已經唔記得當時被批判過啲乜，而且我都有一啲經歷，冇以前咁執着，亦唔會咁輕易自尋煩惱。
「我𠵱家活喺呢個年代，但有啲人會選擇將我停留喺以往，呢個係對方嘅選擇，我已經睇開咗。時間一路向前，我一直都成長緊，唯獨係唔想自己變老油條，Keep住Copy以往嘅模式。」
無論是陳曉東，還是正在揭雜誌的閣下，隨時間增長的智慧，絕不可缺。
早於去年，陳曉東已製作過〈這種年紀〉及〈有你真好》兩首廣東歌，今年他再接再厲，先後推出〈燒光了火柴〉及〈專注〉，同樣是廣東歌，他還直言一毫子也無賺。
「喺工作上，𠵱家我嘅自主度好大，可以做自己想做嘅嘢。作為歌手，我喺香港出道，我想Keep住有新嘅廣東作品，唔使令Fans對我嘅感覺，仲係維持喺好耐以前。出新歌，就可以翻新我嘅Song Catalog，豐富我嘅Portfolio。」
時代變了，陳曉東坦言，網絡世界的發達，並未令其「打歌計劃」有太大轉變。
「以前Plug歌，我會上唔同嘅電視、電台節目，再去商場表演；加埋報紙、音樂雜誌、時裝雜誌嘅訪問，種類好多。𠵱家好多嘢都Audio化、短視頻化，唔係話唔好，而係太過依賴短視頻，就變得單一化咗，所以我都會返嚟，做吓唔同媒體嘅訪問。」
現與妻女、母親定居北京，說陳曉東的基地北移，他即說：「其實唔需要講所謂嘅基地，我成日都飛嚟飛去，亦唔鍾意一路Stay喺一個地方，做同一樣嘅事。我對自己嘅要求，只係唔好滑椏。」
明年便是陳曉東入行30周年，他笑言歲月如梭，但其初心不變。
「成長最得意嘅地方，係我對以前嘅自己好陌生，但係今日嘅我，就係以前嘅我一路走過嚟。𠵱家我介意嘅，反而係因為咁多年嚟做嘅事，好似上舞台唱歌咁，我重複去做，就變咗自然，咁會俾人一種好油嘅感覺。所以我先會將自己『清零』，唔好成日Copy & Paste。」
要與時並進，陳曉東還密切留意一眾後輩。「我跟得好貼㗎！之前Dear Jane一plug〈到底發生過甚麼事〉，我一聽已經好鍾意，仲想請佢哋做我演唱會嘉賓，但係時間夾唔到，睇吓遲啲會唔會再有機會。
「最近我就好鍾意一個叫凌雪怡嘅新人，佢首〈愛情裏的小人物〉，好青春！佢又唱到嗰種少女情懷，所以我將首歌加埋落我嘅Playlist入面。」
事業隨心發展，陳曉東的家庭生活，更是稱心如意，跟台灣籍的太太王妤嫻結婚9年，育有兩名分別9歲及8歲的女兒，現在三代同堂居於北京。說到女兒，他即展現「傻瓜」一面。
「可能女仔係特別乖啲，佢哋都視學習為娛樂，好似大女練8級鋼琴，練到成功彈到嗰首歌，我會讚佢：『連爸爸都彈唔到。』。佢哋都有學書法、圍棋同芭蕾舞，學得好開心。
「反而係我，見到佢哋學芭蕾舞要篤腳（足尖），會怕佢哋跳爛啲腳，於是提議佢哋停吓唔好學住，但係佢哋唔制。」
說到與女兒們相處的時光，陳曉東略帶遺憾表示：「因為我嘅工作性質，導致我單獨帶佢哋嘅時間唔夠多，我係指獨佔嗰隻。雖然我老婆帶得好好，但我始終都好想單獨同啲女，行吓公園、睇吓戲，就算一齊洗一次車都好。
「我覺得人與人之間，每一個都係獨立嘅account，所以我要為每個account製造多啲Memory。而且我係第一個出現喺啲女生命中嘅男士，係佢哋Looking for guidance and love嘅目標，我要再做好啲。」
雖然女兒們尚年幼，但遺傳了父母的優質DNA，她們也收到不少同學的表白。
「佢哋話我知有人同佢哋表白，我就教佢哋，要回覆得有智慧啲，好似『多謝欣賞！』或者『有Taste！』。哈哈！仲會分析俾佢哋聽，會有同學欣賞佢哋嘅原因。」
好戲在後頭，話畢的陳曉東，裝出兇惡模樣說：「佢哋再大啲，就唔係呢個講法！『走呀！』。」
不是韓劇，夫妻的世界，不一定是驚濤駭浪、勾心鬥角。
在太太王妤嫻跟前，「女兒傻瓜」陳曉東瞬間變身成「寵妻狂魔」。
當愛妻被指揮金如土之時，他挺身護妻稱：「係我話靚，叫佢買嘅。」
談及結婚9年的枕邊人，他笑說：「多得老婆處理屋企大小事務都咁好，我先可以放心搏殺。」
訪問這天，陳太與陳曉東雙雙現身，後者稱：「今次得我哋兩個返嚟，難得可以過吓二人世界！」前者只微笑着說了句：「我是助手。」
訪問期間，陳太為丈夫拍下花絮照，還仔細檢查陳曉東的牙縫，可有影響其靚仔樣的菜屑，所有細節也十分上心。
當問到陳曉東可是浪漫的丈夫，他支支吾吾，我就轉頭問陳太同樣的問題，回應是簡單而威力強大的：「他不浪漫啊。」
陳生即說：「我會係咁意嘅，（有冇送花？）係咁意啦⋯⋯」
訪問後，陳曉東即轉台以國語問愛妻：「你想去哪裏？」陳太也是簡單一句：「都可以。」
簡單，就可以了。
時間最公平，也是最無情，不會為誰停留
