《2023 EYT好友會聯歡晚宴》昨晚（19/9）舉行，近260多位藝員及幕後出席，筵開21圍，多位久未露面的藝人現身，包括從加拿大回港的夏雨，過著半退休生活的他，更偕太太馬慧玲現身，表示很珍惜每次聚舊機會，見得一次得一次。
夏雨近年進駐抖音並狂拍旅行片，他受訪時稱自己遊手好閒四圍去玩，貪得意拍片，但見大家反應幾好。又表示短片非一般美食、景點旅行片，而是主打睇每個地方的民生、福利、生活，下月將去雲南麗江和新疆，但不會與囝囝黃奕晨同行，自己亦很少留意對方演出。
講到有冇畀意見囝囝，他說：「冇畀意見，佢做咗咁耐自己有足夠經驗。（唔會教佢演戲？）佢自由發揮，我嗰啲唔係好正路，跟唔到。我依家都有間製作公司，不過我都唔係好理，有套戲叫《九月返歸》（按：應為《七月返歸》），你有冇睇吖？」講到有冇戲癮，夏雨表示：「有啱嘅就會拍，好劇本、有好嘅錢我都會做！」
