台灣歌手王力宏日前假台北小巨蛋舉行「復出騷」，當時佢提到同前妻李靚蕾嘅風波，佢坦言：「最近發生的事，你們知道的比我還要多，我做過甚麼，連我自己也是看新聞才知道。真相不是那麼重要，流量最重要。」點知一個「流量論」竟成箭靶，歌后甄妮睇到新聞報道後，即大動肝火，公開力斥王力宏：「是人來瘋？還是吃錯藥？出自高學歷的嘴裏真是不知所謂。」隔空罵戰隨時一觸即發！
對此，演唱會主辦單位寬魚國際執行長邱瓈寬表示，希望當日未到場睇表演嘅人可以了解來龍去脈，叫大家唔好畀網路流傳片段斷章取義造成誤解，又還原當晚演唱會王力宏一席話，指佢其實係以疑問口脗，感慨婚變當時突然爆出種種流言蜚語，無憑無據卻傳得人盡皆知。雖然王力宏方面極速解畫，不過樂壇前輩甄妮同網友受唔受落就睇後續發展如何喇。
