2014年前港姐馬賽捲入艷舞風波，爆出與內地製片人汪子琦同性戀情，二人一同歐遊並被拍得於上海攬啜，馬賽被指介入汪子琦與富婆Laura婚姻中做「小三」，令她形象插水即被無綫雪藏，最終返回內地發展。
現長居北京的馬賽日前快閃返港，日前她應《東周刊》副社長BilIy(黄庭桄)邀請接受直播獨家訪問，期間重提9年前嘅黑歷史。
當天還有神秘嘉賓前無綫企業傳訊部宣傳科副總監曾醒明(曾爸爸)，曾爸爸由港姐開始睇住她長大，馬賽見到曾爸爸即感動爆喊，因為2014年7月面對事業低潮時，曾爸爸陪伴她開記者會。曾爸爸好記得，當時馬賽喺記者會門外表示驚慌顫抖，為咗派定心丸，他就毫不猶疑拖住馬賽步入會埸，翌日竟然大幅入鏡成為頭版新聞。
記者會上馬賽哭了3次，成為淚人。回憶舊事，馬賽亦深覺自己處理未成熟，智慧唔夠，唔應該俾情緒掩蓋件事，但當時覺得自己好委屈：「之後去咗英國遊學遇上前輩古天樂，連佢都問我『點解會喊？』而藝員科高層樂易玲就送嘉玲姐(劉嘉玲)危機兩個字俾我，佢話『危機危機，有危有機。』其實當時我視為危，冇把握好個機，經此一役係個好大嘅成長課題，人生好神奇，更感恩當日留喺我身邊嘅每個人。」
Billy追問她會否想抹走當年事？馬賽卻說不用，因為咁樣，才變咗一個更加有智慧嘅人：「其實當年我喺社會乜都唔識，TVB係個好好嘅木人巷，嗰兩年令我好快咁成長，加上之後返咗內地發展，由低開始做學會好多，所以冇後悔做過嘅任何嘢，反而愧疚冇好好把握TVB栽培，但我相信自己能變成一位更好嘅藝人。」
馬賽談及過去的打擊，她坦言因此而患上抑鬱症，冇晒精神，瞓唔到覺，要食西藥治療，之後開始信佛及研究中醫「救自己」。她分享經驗之談：「原來捱夜、捱凍陽氣不足，身體變差更易有唔好嘅思想，故要Keep住保暖、飲暖水、唔好着咁少衫、要曬多啲太陽、親近多啲大自然及有足夠睡眠，要養成良好嘅生活習慣，順時生活好重要。」結婚4年，育有4歲囡囡Camellia嘅馬賽生活幸福：「𠵱家調整個人心態，每日都好感恩，所以淚點都變得超級低。以前身在福中不知福，直至去到最低潮時先睇到自己嘅位置。喺最黑暗嘅日子，我會寫感恩日記，記下一啲小確幸。」
