台灣女星賈靜雯因出演內地真人騷《乘風2023》（原名：《乘風破浪的姐姐4》）人氣高踞不下，而日前錄完節目趕住返屋企享受家庭樂嘅佢，搭飛機時竟然遇上意外，唔使2個鐘嘅機程最後搭足9個半鐘，足足多咗7個半鐘！
錄完節目就急急腳返台灣嘅賈靜雯，日前喺社交網晒出從機艙影嘅唯美夜景，並透露自己中午12點就從上海機場出發返台灣，未料天氣不似預期，竟被告知飛機要迫降福州機場加油，結果飛機喺空中盤旋一陣後又決定轉飛桃園機場加油，最後先飛返原定目的地松山機場。
賈靜雯透露，桃園機場到松山機場距離僅40公里，機程更喺只需15分鐘，但估唔到過程竟然一波三折：「我竟然中午12點出發到晚上9:30才落地……」兼搞笑抽水道：「原來乘風的日子是如此的不捨結束，讓我繼續在空中乘風。」最終順利歸家嘅賈靜雯，亦不忘喺社交網晒出素顏自拍同粉絲報平安。
