無綫藝人游嘉欣早前報名學車，自嘲手腳不協調的她笑指上了一課後信心大增：「本身有啲擔心，但又冇想像中咁騰雞，其實最驚係唔小心入錯線，因為自己係路癡，逆線就大件事。」嘉欣指近期拍劇經常遇到角色需要駕車，所以趁有空檔便報讀駕駛課程以備不時之需：「近排拍《非常檢控觀》要揸私家車同電單車。（會學埋電單車？）本身冇興趣，不過拍劇試過坐車尾又覺得幾好玩。」
本身懂騎單車的她，笑指不知何故幾乎每次騎車都會出意外，就連騎四輪家庭單車也不能幸免，左邊香肩更因此留有疤痕：「中四嗰年同媽咪、家姐3個人踩家庭單車，見隔籬都係踩家庭車個細路好似想同我哋鍊車咁，仲過埋我哋頭，於是我同家姐咪發力追，我諗住企喺度踩會踩得快啲，點知跣腳踏空，膊頭落地磨住地下行十幾米先停到車，好在啲頭髮冇戟入個轆，因為太突然我哋都嚇到呆咗，撻瘌依家仲喺度。」她笑言經一事長一智，自此也不敢跟別人「鍊車」，更自信地表示自己將來一定是個安全駕駛者，問到現在豈不是不能拍露膊照？她豁達地說：「少少啫，人有啲疤好正常嘅。」
