賭王何鴻燊與三太陳婉珍的孻仔何猷啟同內地前妻齊嬌（Gigi）離婚後，兩名女兒由齊嬌照顧，不過齊嬌生活愈見奢華，最近佢更飛去日本試荷里活級別嘅保養針，價格更加係驚人地奢侈！
齊嬌喺社交平台晒出自己吊針同敷面等靚相，原來佢去試貴族保養針，除靜脈注射之外，又晒出多樽含NMN（Nicotinamide mononucleotideβ-煙醯胺單核苷酸）嘅注射針劑，可有效延緩至逆轉衰老及保持活力，收費130萬日圓（約70,475港元）。
佢就分享心得：「傳說中好萊塢（荷里活）女星都用的貴族保養針？這次去日本特地感受了一下每月保養的一款貴族保養針，可以選擇點滴和直接注射部位兩種形式。我選擇了兩個都進行！將抗老抗衰進行到底。」雖然價格不菲，但齊嬌就話好值得，仲強調佢係為咗身體健康先去試，唔係只為靚靚，明晒。
