無綫新劇《痞子無間道》早前拍攝完畢，4位主角周嘉洛、陳瀅、JW王灝兒同朱敏瀚已被安排要去泰國拍真人騷，不過原本4人成行，結果周嘉洛臨時甩底，原因竟同《愛．回家》有關！
陳瀅、JW王灝兒同朱敏瀚早前去到機場，為全新綜藝節目《約埋班Friend去旅行》出發去清邁拍攝，不過原本約好一齊去嘅周嘉洛就離奇No Show，原來就係因為要回歸拍《愛．回家》而未能同行，所以就只得佢嘅《痞子》公仔成行喇。
幾個老友夠晒義氣，精神上玩埋周嘉洛嗰份，朱敏瀚仲講笑話原本同床瞓，依家只可以同公仔瞓。不過得知唔齊腳出發之時，原來JW王灝兒出發前一度嬲到喊出嚟，陳瀅就猛咁咿咿哦哦唔識停，朱敏瀚仲呆坐一邊唔知點反應先好呀。朱敏瀚淨係講：「《愛．回家》需要佢，我哋心中需要佢﹗」陳瀅又叫JW王灝兒再喊多次，認真慘豬！
由《痞子殿下》一直到《痞子無間道》，再殺到去拍旅遊綜藝，可知《痞子》組合相當受歡迎！周嘉洛之前喺《痞子無間道》收工飯局曾透露仍未收到返回《愛．回家》劇組的消息，並開玩笑表示：「有新加入的角色那麼強勁，不需要我了﹗」而這個新角色網民都猜測是指楊明。最後周嘉洛笑言指如有機會，都想回去玩。 估唔到，早前（19日）仲見到周嘉洛孖住JW王灝兒同朱敏瀚在《2023TVB年中節目巡禮》為旅遊綜藝做宣傳，現在周嘉洛卻被急急召回《愛．回家》，或者有機會同新角色楊明有對手戲喎！
《愛回家》播出多年，成功捧紅多位演員，不過其中唔少演員都突然被「送走」，而網民就表示最唔捨得去吳旺達工作嘅「金城安」周嘉洛。不過，睇嚟之後好快會見到安仔回歸！網民更猜測今次係無綫高層曾勵珍夠「牙力」，成功留人！不少網民表示：「可能綜藝組同贊助商唔夠惡！」、「其實《愛回家》都有楊明，使乜金城安。」
近年多次傳出TVB有意停播《愛回家》，但又多次宣布「添食」，由原本的180集增加到2000多集。然而，在日前TVB公開的預告中，於本周五（30/6）播出的第2000集竟然被稱作「大結局」，令不少劇迷猜測《愛回家》是否真的去到了盡頭。
第2000集的「大結局」劇情講述龍敢威（羅樂林飾）、龍力士（鄭世豪飾）齊遭綁匪綁架，兩人合力逃出生天，怎料力士不滿敢威於危急關頭將接龍交予力蓮（林淑敏飾）接掌，竟對敢威動殺機。力士行兇的事情敗露，把心一橫決與力蓮玉石俱焚，致電力蓮聲稱在公司一個隱蔽的地方安裝了炸彈，並會於五時引爆。接龍進入緊急狀態，力蓮宣佈接管接龍，卻有人提出反對……力士的行動最終失敗，唯有設法逃亡，怎料竟引發不可收拾的局面……
不過呢集「大結局」只係故事中嘅結局，而且，下周的預告中仍見到2001集及2002集的預告，所以《愛回家》依然長做長有。
文章版權為新傳媒集團所擁有，原文請按： 网页链接
