無綫歌唱比賽《中年好聲音2》尋日（24日）喺將軍澳舉行第二輪海選面試，除咗有唔少素人參選外，更有唔少係前藝人及藝人親戚參賽，重捨歌唱夢。而曾於2010年出道做歌手嘅陳慧婷（前名：葉慧婷、陳蒨葶）都有份參加面試，不過就被伍仲衡批評聲音唔夠辨識度，揚言做歌手蝕底；另外韋綺姍雖然就表示唱得唔錯，可惜要注意高音問題。
而面試期間，唔少網友都覺得陳慧婷望落相當面熟，事實上2010年曾以藝名葉慧婷進軍樂壇，隔年亦推出過個人EP《新一天》，有指成績不俗，榮登香港HMV銷量榜第一位。可惜之後事業發展普通，毅然再改名為「陳蒨葶」轉戰政界，但最終失敗收場。甚至有指陳慧婷去年轉戰地產界，為地產公司拍片宣傳，未料疑因「真空」着浴袍介紹豪華浴室，影片最後因「太暴露」下架。
