由王心慰（Amy姐）監製TVB劇《隱門》在昨晚（6月15日）劇情圍繞子喬（陳展鵬飾）與親母Sophie（韓馬利飾，年輕版由尹詩沛分飾）恩怨，子喬一直認為Sophie拋夫棄子，直到葉嘯天在老人院脅持Sophie兼自爆曾與Sophie發生關係，Sophie才向子喬坦白過去。
原來Sophie年輕時曾遭葉嘯天虐打、強暴兼打毒品針，老公（徐榮飾）知悉後不但袖手旁觀，更著Sophie死忍，情緒崩潰的Sophie才決心離開。
昨晚除葉嘯天以變態Tone脅持Sophie令網民大嘆「真係好癲」，「Mary姐」韓馬利及尹詩沛的演技亦備受好評，有網民更大讚詩沛顏值有增長。
飾演年輕版Sophie的詩沛雖然出場時間不多，但每場演出均相當搶焦，不是遭吳岱融瘋狂蹧質（強暴打鬧兼啤酒淋頭），就是哭得肝腸寸斷。演苦情戲有一手的詩沛，所有痛苦場口均演得不慍不火，在眼眶不停打轉的眼淚更份外令人動容。
詩沛透露由於演繹的是Mary姐「濃縮版」生平，劇本並未予以演員限制，相關場口都是由演員靠豐富想像力演繹；對此詩沛大讚岱融哥功力深厚：「每一場有岱融哥嘅戲，佢都會一嚟就諗定晒點做、點夾，所有嘢都好清晰同好快。
同佢啲場口雖然好激烈，但我一啲都冇受傷，呢個係好難拿捏到，佢每個位都好準確，無論打我還是淋我啤酒，佢全部就好晒力，我只要表情落力啲就會好似好逼真。」詩沛續指由於十分喜歡所演角色，所以每天都是懷著興奮心情開工。
除尹詩沛，昨晚另一女配吳沚默演出同樣精彩，飾演姣味女公關波波的沚默，在劇中風情萬種，並同獲杜燕歌及吳岱融垂青，最終因貪圖電影女主角地位與杜燕歌發生關係…二人床上戲今早更在無綫官網播出加長版。
片段所見，沚默與杜燕歌床上埋身肉搏相當癡纏，不過沚默受訪時笑指拍攝時並不尷尬，皆因對杜燕歌百分百信任。
吳沚默稱：「其實我哋之前合作過好多次，本身好熟絡，但我事前有同Mary姐講：『我要同你老公上床』。不過因為我驚自己唔夠放，所以拍床戲前有飲半杯威士忌壯膽，希望出嚟唔好太醜樣同嚇親大家。」
談到獲不少網民激讚演出味道，沚默笑指甚為意外，並坦言對自己魅力「零信心」，全靠監製Amy姐事前給予強心針：「因為之前喺《黃金有罪》做過舞女，Amy姐覺得我做得好，所以先畀信心我今次再做，既然佢對我有信心，我覺得自己放膽去做就得。」
