現年55歲的李婉華（Anita）近年經營個人YouTube頻道，搞得有聲有色，有超過13萬人訂閱，近日她帶同愛女Natalie一齊返港，準備為頻道拍攝一輯香港美食特輯，原來今年已19歲的Natalie能歌又善舞，仲識得做戲，大學畢業後就隨時可以入行！
李婉華自2003年嫁給加拿大籍股票經紀人李守正後，就淡娛樂圈，專心在加拿大相夫教子，她在婚後先後誕下一女兩子，大女Natalie近日陪媽咪一齊返港拍片，更一齊出席傳媒活動，不但在鏡頭前表現淡定，更直言鍾意唱歌和跳舞，以及想入行做演員。
李婉華透露目前與Natalie分別住在溫哥華和多倫多，平時甚少見面，所以她十分珍惜今次兩母女同遊香港的機會。李婉華笑指女兒好鍾意香港的美食，未來亦希望可以返港工作，以及學講廣東話，Natalie就笑言最鍾意香港夠熱：「多倫多好凍，要著住褸，呢度唔使。」
被問到女兒會否加入行，李婉華即反問囡囡係咪鍾意做演員？Natalie怕醜地以點頭回應，並指自己好鍾意跳舞同唱歌。李婉華則代女兒回答：「佢鍾意唱歌，跳舞亦好叻，喺多倫多大學都係學跳舞同讀戲劇，攞好多獎，但無諗過佢會入呢行，佢今年升大學三年班，我自己希望佢讀完書先。」
雖然一講到有冇拍拖，Natalie就耍手擰頭表示沒有，但李婉華就玩踢爆話：「都冇得唔畀，佢話自己好多男仔追。」Natalie即說：「但我唔鍾意佢哋！」此外李婉華係「神徒」，今次返港最想見到Anson Lo和姜濤，但Natalie原來唔識得MIRROR，只表示自己的偶像是媽媽，令李婉華冧爆。
2021年6月李婉華曾貼出大女Natalie穿上畢業袍的照片，表示大女代表同學上台致詞，暑假後便展開大學生活，李婉華接受媒體訪問時，大讚Natalie生性有主見，堅持自己負起大學學費，為此而打三份工賺錢，雖然大讚女兒為目標堅持到底，但李婉華卻很心痛女兒如此辛苦，不過女大女世界，李婉華只能支持女兒的決定！
文章版權為新傳媒集團所擁有，原文請按： 网页链接
