周奕瑋（Jarvis）最近受盡無綫力捧做金牌司儀，年初時在無綫台慶頒獎禮「單拖」上陣，表現淡定無甩稿，氹到班觀眾個個讚好，難怪被形容為「鄭裕玲接班人」。自此周奕瑋星途行足大運，成功埋曾志偉堆與陳嘉慧到日本拍節目。睇返資料原來周奕瑋2018年主持《周遊東京》後人氣急升，無耐就簽經理人合約，坐正做無綫親生仔，但近日有人發現無綫官網「經理人合約藝員」已將周奕瑋除名，唔通又準備走佬離巢？
周奕瑋年初時在無綫台慶頒獎禮「單拖」上陣做司儀，表現淡定到似老司機，難怪觀眾睇到嗒晒糖讚周奕瑋。除咗冧盡師奶，周奕瑋出色表現都成功感染傳媒，獲封「鄭裕玲接班人」。正當周奕瑋嘅事業發展如日中天，大家都好期待無綫大騷長期見到佢之際，就有人發現無綫官網「經理人合約藝員」已將周奕瑋除名，但在「男藝人」一頁周奕瑋依然存在，意味住已與無綫變回普通關係。
周奕瑋事後回應傳媒，指雖然條文上與無綫合作關係有變，但大體會同以前一樣，最緊要係周奕瑋好鬼敬業，聲稱無論點都會繼續努力工作！但當傳媒過問到收入、唔續約親生仔原因時，周奕瑋就開始寡言唔回應啦。
周奕瑋主持台慶頒獎禮獲得好評後，於社交媒體出帖，大談感受，當他知道要擔任如此重任第一個反應是：「唔係啩？我憑咩？」之後立即翻睇所有劇集，務求了解每個入圍者的作品寫稿，周奕瑋說：「很多朋友問稿子難不難背？稿子不難背，只是難寫。因為很想要傳遞好那份溫度和重量。」他除指自己經驗不足令到表達未足以用「剛剛好的力度和溫度去詮繹」外，又感謝所有幫過他的人，特別點名感謝娛樂新聞台。
因主持《萬千星輝頒獎典禮2022》獲大讚並極速上位的周奕瑋，早前行足大運埋老細堆，陪同TVB總經理兼主持人曾志偉及另一主持人陳嘉慧（Erica）一早現身機場，準備乘搭大灣區航空東京首航到日本出差進行拍攝工作，3位皆表示於因疫情影響久未踏足日本，心情極為興奮，仲話「興奮到瞓唔著」！
文章版權為新傳媒集團所擁有，原文請按： 网页链接
