無綫劇《新四十二章》除向《鹿鼎記》致敬外，還融合歷史和功夫元素，再加上無厘頭古靈精怪劇情引爆笑彈，例如有龔家欣患有生鬚怪病，而手短腳短只有149cm高嘅糖妹（黃山怡），竟然係武林高手兼Big Boss，仲要搞到呢位高登女神整爛塊面見人。
昨晚（2月27日）無綫劇《新四十二章》，糖妹（黃山怡）的Big Boss真身終極曝光，仲同馬海倫嘅護花使者鄭家生喺後巷大戰，身高140cm擁五短身形的糖妹是武林高手，最後雖然戰勝對手，但元氣大傷吐血兼爛臉，原來過去150年，糖妹都係利用大寶丹返老還童。
該場後巷大戰雖然只有短短分半鐘，但糖妹同鄭家生足足拍咗一晚加一個通宵。根據無綫提供嘅花絮片段，雖然糖妹吊威也喺的士上跳高擒低已相當考體力和腳力，但原來都唔及耍劍令佢大傷腦筋。話說劇情糖妹需要先將劍拋高才刺向鄭家生，為咗拋得有型、刺得瀟灑，糖妹專登為咗呢個鏡頭重覆排練N咁多次，但都係不斷甩手變成「空中飛劍」。糖妹仲話拋劍心理壓力比吊威也大：「因為好驚會整親人。」不過，糖妹就搞笑指拍打戲最難係keep住個靚樣：「武指成日叫我唔好擘大個鼻哥窿，又話唔可以眨眼。」武林高手原來唔易做。
至於在劇中的「爛面」造型，令糖妹要犧牲色相，她笑言係入行首次成塊臉倒模：「我依家有個人形石膏喺TVB化妝間，好勁架，哈哈！嗰個造型每次拍之前係要黐上去嘅，好彩拍嗰時唔使打太多，因為嗰塊嘢撻落塊面度，再加埋出汗嘅話都好杰撻撻。」糖妹還額外展示了自己的清朝裝造型照，配合爛面妝加服指專誠打造的七彩民族風造型夠晒「百變」。
除了爛面造型外，糖妹在劇中更有古裝及時裝造型，其中結局篇更會以丐幫的「獨眼造型」登場，與龔嘉欣展開終極決戰！
文章版權為新傳媒集團所擁有，原文請按： 网页链接
