藝人梁嘉琪今午（13日）聯同丘靜雯、簡采恩為HOY TV資訊節目《一線搜查》進行錄影，首次擔任《一》主持的嘉琪身穿西裝外套，拍攝時一表正經，與平日嘻哈形象截然不同，表現得有點緊張，幸好停機後有兩位拍檔教跳「一線舞」紓緩緊張氣氛。受訪時嘉坦言今次是一大挑戰：「好緊張，最初入行就係喺呢度做娛樂新聞台主播，形式比較輕鬆，之後咁多年做主持都係行呢個路線，但今次好唔同，氣氛嚴肅好多，好多時都畀幕後人員善意提醒我手唔好咁多動作、語氣要嚴肅啲，都NG咗幾次，哈哈。」談到類似節目要經常落區接觸不同階層，時有衝突情況發生，問到會否擔心安全問題？她表示因要時間適應新主持方式，暫時不會出外景所以未有擔心。
而近年主力主持節目的她，坦言仍有「戲癮」很想拍劇，她説：「7、8年冇拍過劇，拍戲都好似3年前，疫情成日喺屋企煲劇，好多時睇睇吓都會幻想如果自己做會做成點？（想做咩角色？）乜都做，總之有得演戲就得，哈哈。」
