現年54歲的袁文傑於1990年入讀TVB第四期藝員訓練班，不過畢業後並沒有加入TVB，有一段時間走去做模特兒，曾參演電影《家有囍事》中「家明」一角，簽約亞視後憑著高大英俊而獲得「亞視型男」之稱，一度受亞視重用，除擔演劇集主角外，亦曾嘗試主唱劇集歌曲、擔任多個大型綜合節目主持。昨日袁文傑為好友李婉華的YouTube頻道做嘉賓，同場還有昔日亞視好友杜挺豪和林子博，他們大談在亞視年代的開心事，言談間袁文傑自爆曾被亞視女星夾硬迫認緋聞，幸好得李婉華幫手解圍！而這位亞視女星，正是謝雪心的女兒珈潁。
2001年袁文傑和李婉華曾在《親子情未了》合作，其後公司舉行記者會，期間發生一件令他相當難忘的事：「當時公司喺後生嘅就用咗最老土嘅宣傳招數，就係玩情侶檔，當時有個同事叫珈潁，即係謝雪心心姐個女，記者會完咗之後，記者就追問呢啲所謂緋聞嘅事，多得公關大員幫我哋造新聞，記者會完咗之後，啲記者不斷問我，我又硬晒軚兼面都紅埋：『係咪啫？係咪追人啫？點樣啫？』難得在我旁邊個珈潁，竟然含羞答答笑住咁望番住我，記者一路問，佢一路望係咁望住我，好似感覺係：『你表態啦！你表態啦！』大佬，我表咩態啫？夾之嘛，我心係咁諗，但嗰一刻我又唔講得粗口，又唔知點好，嗰個狀態真係好困境。」
袁文傑幸好貴為女主角的李婉華突然間出現，義無反顧地坐在兩人中間打圓場：「嗰陣時真係落唔到台，班記者直情話我：『女仔都認咗，乜你咁冇風度呀，你唔認呀？咁樣咁樣』，我份人直腸直肚，超，認咩？係就係，唔係就唔係，如果我好大聲話唔係，又怕Hurt到旁邊嗰個，真係唔知點處理！」
同場的杜挺豪突然又爆有相同的事件發生在他的身上，女主角亦都是珈潁：「我都有壇嘢，返內地拍嘢，影我下半身要濕身，見到下面現咗形，記者問我係咪見到珈潁所以小杜杜有反應呀？我否認，不過最後出咗新聞：『杜挺豪望住珈潁有反應！』珈潁當時又係含羞答答咁望住我，做乜嘢呀？」
