孫慧雪日前宣布正陀第二胎，不少網民都恭喜她將再做人母。但不少觀眾擔心她在處境劇《愛．回家之開心速遞》中的戲分，會隨住待產而要離開劇組。劇中飾演「KC」歐瑞偉女友「朱茜」的孫慧雪，被不少人問：「個肚係咪KC呀？」非常入戲，而她就回應網民，更叫大家提供建議，帖文一出即有不少人編劇上身兼好有創意，除跟「KC奉子承婚」外，更有不少「帽事」劇情。
日前孫慧雪在社交網打趣問網民：「民意調查！宣布咗懷孕嘅消息之後，我一日都會被人問十次，咁你同KC會點？KC會唔會換女朋友？你呢胎可唔可以係KC㗎？不如你哋話我知，你哋嘅創意答案，可能監製、編劇們會採立你哋嘅意見㗎！#好開心見到有人話驚要等好耐 #驚見唔到我拍戲 #有人話鍾意睇我做戲 #真係老懷安慰」。不少人就「度橋」畀意見：「劇本寫你和KC奉子承婚」、「劇本照寫你有咗，跟住結婚，再繼續拍至八個月，話去外國生仔坐月，生完再過幾個月攞個公仔BB回來拍劇」、「KC 要負責」。而「綠帽」故事線亦有不少：「個肚其實係根叔嘅」、「梗係屈KC，生咗出嚟先話係大龍生」。
而孫慧雪對呢一個版本就最Like：「Rachel知自己有咗，但KC有其他嘢煩緊唔敢同佢講住，結果比Terry發現咗，之後Terry負責照顧Rachel個段時間，成日出出入入間屋又比kc發現。KC以為Terry比綠帽佢戴就玩一大輪（唔詳解啦）」。此外，飾演KC的歐瑞偉都幾旺女拍檔，事關劇中飾演其前女友Icy的岑杏賢，因結婚生仔而離開《愛．回家》劇組，換新女友孫慧雪後，對方亦懷孕。
現時40歲的孫慧雪於2016年做人妻，日前她在社交網宣布陀第二胎，兒子Riley即將做哥哥，更自爆婚前曾發現患有「子宮肌瘤」，當時被醫生批「冇得生」，又因本身有腺肌症及腺肌瘤的問題，十二周前難免有出血情況，要每晚到醫院打安胎針，以及不能有大郁動，約略計算已大約打了四十針：「因為要在左右盆骨兩邊特定的位置打針，所以兩邊都是瘀青及腫起一大塊。」
