陳豪、龔嘉欣、江嘉敏、周嘉洛等主演無綫新劇《新四十二章》尋晚播出首集，劇集本來是台慶劇，連台慶宣傳片也有提過，但有傳龔嘉欣與陳瀅不和，致劇集狠被抽起，最終安排炮灰期播出。劇集監製陳維冠創作向來天馬行空，今次新劇便是向《鹿鼎記》情節致敬。不過有眼利網民發現，《新四十二章》海報設計另有乾坤，巧妙同人撞橋，未知是否屬劇集致敬部分之一。
內地劇《一路繁花相送》講述都市愛情，改編自青衫落拓同名小說，由鍾漢良、江疏影、炎亞綸、李晟等主演，喺2018年播出，早過《新四十二章》好多。睇返兩套劇嘅海報，發現《新四十二章》都巧妙地撞足《一路繁花相送》，眼利的網友寫道：「兩款海報都係主角排排坐」、「部分角色同樣翹腳chok樣」、「海報背景都係淺色主調」、「劇名字眼都同樣由紫色漸變至藍色」。為咗驗證兩套劇嘅海報有幾神似，有網民曾經用Google影像搜尋功能，上傳《一路繁花相送》海報，結果竟同時驚現《新四十二章》初版海報，睇嚟就連Google都認唔出兩者分別。
後來無綫再換《新四十二章》宣傳海報，依然無辦法洗脫「抄襲」罪名。有網民發現《新四十二章》正式播放版海報同荷里活大片《復仇者聯盟3: 無限之戰》極似，他們留言寫道：「背景同樣太空銀河系為主」、「主要角色列陣排位接近一樣」，但無綫《新四十二章》版本，顯著設計無咁精緻，用色較為粗糙。
文章版權為新傳媒集團所擁有，原文請按： 网页链接
