台灣男星柯震東日前拍攝新劇時，被無人機爆破炸傷臉部致毀容，縫足30針嘅佢即暫停一切工作養傷，現傷口已拆線並漸漸愈合中。雖然佢久未公開露面，不過台媒就發現佢終於現身，深夜同成班friend現身台北睇至Hit新片《The First Slam Dunk》，即使自己做唔到劇烈運動，都可以睇片當追逐籃球夢。不過佢就口罩不離身，加上佢以衞衣衫帽笠到實，不過都依然見到佢左臉顴骨上嘅大紗布。
同時，台灣消息早前指意外發生當時情況驚悚，包括「無人機近距離捕捉臉部特寫」、「失靈無人機在柯震東面前爆炸」、「葉片四射險毀容」等，但有指其實當時無人機並非拍攝柯震東特寫，而係拍攝成個場景，最終無人機失靈故障，但未有發生爆炸，而柯震東閃避不及，就唔好彩被撞到臉部，導致佢左面顴骨處受傷破相。
